Inhalt
Wat kütt erus, wa’mer 15 Theaterstöcker vum Trude Herr en eine Pott schmieß un dann gaaanz genösslich durch der Scala-Wolf drieht? Genau! E rösig Theaterspektakel bei däm uns selvs de Luff fottbliev.
En däm turbulente Spillche treffe plötzlich all Figure us dä knatschjecke Komödie openander: Üvverdriehte Wiever, schääle Casanovas, Föttchesföhler, selvsernannte Modeschöpfer, Ääzezäller, Botzedresser, avgebröhte Rüffcher un Mauerblömcher.
Un natörlich die großen Paare der „herr’schen“ Weltliteratur: Herodes un Mariamne Müller, Jean-Jaques un Melanie Schmitz, Karl Salewski un Anneliese Kolvenbach.
Un wann dann Frankensteins Schwiegermutter, et versoffe Lenche un de kölsche Geisha nit nor versöke durch ein Dür op de Bühn, sondern och op eine Abtredd zo kumme, künnt Ehr Üch dat Palaver jo jetz ald vürstelle.

Vürhang op för: TRUDE
Hätz, Geföhl un Tschingderassabum!